भाव तो अपुरा

न बोलताही चेहऱ्यावरचे भाव खूप काही सांगून जातात. त्याला शब्दांची गरज पडत नाही. दुसऱ्याच्या सुखात स्वतःचे सुख शोधणाऱ्याच्या चेहऱ्यावरील भाव हे खूपच प्रेमळ असतात. जे आपल्याला आपल्या मातेच्या चेहऱ्यावर निरंतर दिसून येतात. त्यामध्ये कुठलाही स्वार्थ
दडलेला नसतो.
           काही वेळेस वर वर दिसणारे भाव हे बाह्यतः वेगळे आणि आंतरी वेगळे असतात. वर वर पाहता एखाद्याला आपल्याविषयी खूप आस्था आहे, काळजी आहे, असे वाटत असले तरी आंतरी एक प्रकारची असूया त्यांच्यात दडलेली असते. ते सहजासहजी
भाव आपल्याला दिसून येत नाही आणि असे अपुरे भाव आपल्यावर नकळतपणे घाव करत असतात. जिथे प्रेमाचा अभाव असतो तोच भाव अपुरा असतो.
          पण कधी कधी परिस्थितीमुळे माणसाला त्याच्या मनातील भाव प्रकट करता येत नाही. आतून खूप काही वाटत असले तरी स्वतःला व्यक्त करण्याचे बळ त्याच्या अंगी नसते, किंवा एखाद्याला व्यक्त होता येत नाही कारण त्याचा स्वभाव त्याला तसे करू देत नाही. पण यामुळे समोरील माणसाला त्याच्याविषयी गैरसमज होऊ शकतो. त्याचे भाव अपुरे राहिल्याने इतरांवर त्याला प्रभाव पाडता येत नाही. म्हणून ' अपुरा असता भाव, जो देई मनासी घाव, न लागे जीवनात निभाव.'

सौ.  राजश्री सुहास जाधव.